عميل جديد يسجّل في منتجك، ولما يحاول يدخل يطلع له Email not confirmed. يقول لك: «ما وصلني أي إيميل». تجرّب أنت تسجّل بإيميل ثاني، فيطلع email rate limit exceeded. الخطأين من Supabase، ونشوفهم كثير في المنتجات المبنية بـ Lovable و Bolt، وغالبًا لهم نفس الأصل: المنتج يرسل إيميلاته من خدمة الإيميل التجريبية حقت Supabase.
إيش يعني كل خطأ
- `Email not confirmed`: خيار تأكيد الإيميل مفعّل، والمستخدم ما ضغط رابط التأكيد. Supabase يرفض دخوله حتى يأكّد. هذا تصرّف صحيح، والمشكلة إن الرابط ما وصله.
- `email rate limit exceeded`: المنتج حاول يرسل إيميلات أكثر من المسموح في الساعة، فـ Supabase وقّف الإرسال حتى تمر المدة.
ليش الإيميلات ما توصل
Supabase يجي معه خدمة إيميل مدمجة، والهدف منها التجربة فقط:
- حدّها صغير جدًا، حاليًا إيميلين في الساعة، فأول يوم فيه تسجيلات حقيقية يوصّلك للحد بسرعة.
- ما ترسل إلا لإيميلات أعضاء فريقك في Supabase. يعني وأنت تجرّب بإيميلك، كل شي شغّال، وأول عميل حقيقي ما يوصله شي.
- ما فيها ضمان وصول، والإيميلات اللي توصل ممكن تروح للسبام.
أداة الذكاء الاصطناعي بنت لك صفحة التسجيل، لكنها ما تقدر تسوي حساب عند مزوّد إيميل وتربطه، فيبقى المنتج على الخدمة التجريبية.
سبب ثاني: رابط التأكيد يودّي لمكان غلط
أحيانًا الإيميل يوصل، والعميل يضغط الرابط، فيفتح له localhost أو صفحة خطأ. السبب إعداد Site URL في Supabase، أو قائمة روابط الرجوع المسموحة، لسا على رابط التجربة مو على رابط موقعك. نفس الأصل اللي يخلي تسجيل الدخول بـ Google يرجّع للمكان الغلط: شوف redirect_uri_mismatch.
كيف تتأكد بنفسك
- في لوحة Supabase افتح إعدادات Authentication، ودوّر على إعدادات SMTP. إذا ما فيه مزوّد مضاف، منتجك على الخدمة التجريبية.
- سجّل بإيميل مو عضو في فريق Supabase، مثلًا إيميل شخصي ثاني. وصلك شي؟ في الوارد ولا في السبام؟
- افتح صفحة المستخدمين في Authentication: المستخدمين اللي ما أكّدوا يبان جنبهم إنهم ما أكّدوا. إذا عندك عدد منهم، فيه عملاء ضاعوا عند هالخطوة.
- اضغط رابط تأكيد بنفسك وشوف وين يوديك.
الحل اللي لا تسويه
- إلغاء تأكيد الإيميل كحل سريع. الخطأ يختفي، لكن أي أحد يقدر يسجّل بإيميل غيره، وإيميلاتك الجاية، مثل استعادة كلمة السر والإيصالات، تروح لعناوين محد تأكد منها. أحيانًا إلغاء التأكيد قرار معقول، لكن خذه وأنت فاهم، مو عشان الخطأ.
- تأكيد المستخدمين يدويًا من قاعدة البيانات كل ما اشتكى أحد. هذا يخبي المشكلة، والعملاء اللي ما يشتكون يروحون بصمت.
- إعادة الإرسال بزر يضغطه المستخدم بدون حد. هذا يوصّلك للحد أسرع.
الحل الصح
- سوّ حساب عند مزوّد إيميل، مثل Resend أو Postmark أو Amazon SES أو SendGrid، ووثّق نطاقك عنده.
- أضف بياناته في إعدادات SMTP في Supabase، وارفع حد الإرسال حسب الحاجة.
- أضف سجلات SPF و DKIM و DMARC في إعدادات النطاق، عشان الإيميلات ما تروح للسبام. التفاصيل في إيميلاتك تروح للسبام؟.
- عدّل Site URL وروابط الرجوع لرابط موقعك الحقيقي.
- عرّب قوالب الإيميلات من إعدادات Authentication، عشان العميل يعرف إن الإيميل منك.
بعدها جرّب الرحلة كاملة بإيميل جديد: تسجيل، وتأكيد، ودخول، ونسيت كلمة السر.
تبي أحد يضبطها معك؟
ربط مزوّد الإيميل والنطاق والقوالب شغلة مكالمة استشارية وحدة غالبًا. إذا تبي أحد يمر على تسجيل الدخول كامل قبل الإطلاق، بما فيه الصلاحيات، فيه تدقيق جاهزية الإطلاق. وإذا منتجك على Lovable، شوف مشاكل Lovable الأشهر.