قائمة التحقق قبل الإطلاق.

ليش يهمّ: أي مفتاح في كود الواجهة يقدر أي زائر يشوفه من متصفحه. ومفتاح دفع أو ذكاء اصطناعي مكشوف يعني فاتورة باسمك، أو وصول لفلوس عملائك.

كيف تتأكد: ابحث في كود منتجك وفي مستودعك على GitHub عن كلمة secret، وعن بداية مفاتيح Stripe السرية sk_live. أي نتيجة في ملفات الواجهة لازم تنتقل للسيرفر، وتبدّل المفتاح نفسه.

ليش يهمّ: لو نسخة التجربة والنسخة الحقيقية تستخدم نفس المفاتيح، أي غلطة وأنت تجرّب توصل لعملائك الحقيقيين.

كيف تتأكد: افتح إعدادات المتغيرات في منصة النشر حقتك، وتأكد إن مفاتيح النسخة الحقيقية غير مفاتيح التجربة، وإن ما فيه ملف .env مرفوع في GitHub.

ليش يهمّ: هذي أشهر ثغرة في المنتجات اللي انبنت بالذكاء الاصطناعي: الصفحة تعرض البيانات حسب الرقم اللي في الرابط، بدون ما تتأكد إنها لصاحب الحساب.

كيف تتأكد: سوّ حسابين. افتح طلب أو ملف من الحساب الأول وانسخ رابطه، وافتحه وأنت داخل بالحساب الثاني. إذا طلعت البيانات، فيه ثغرة.

ليش يهمّ: إخفاء الزر ما يحمي شي. أي أحد يعرف الرابط يقدر يوصل للصفحة إذا الخادم ما يتأكد مين هو.

كيف تتأكد: ادخل بحساب عادي، واكتب رابط صفحة الإدارة بيدك. لازم تنرفض، مو بس تطلع فاضية.

ليش يهمّ: لو انكشفت قاعدة البيانات يوم، كلمات السر الواضحة تفتح حسابات عملائك، وأي حساب ثاني يستخدمون فيه نفس الكلمة.

كيف تتأكد: إذا الدخول عن طريق Supabase أو Firebase أو Clerk، هم يتكفّلون فيها. وإذا منتجك يحفظ كلمات السر بنفسه، افتح جدول المستخدمين: لازم تشوف رموز طويلة ما تنفهم، مو الكلمات نفسها.

ليش يهمّ: نسخة ما جرّبت ترجع منها ممكن تطلع ناقصة أو قديمة يوم تحتاجها. وبعض الباقات المجانية ما فيها نسخ يومية أصلًا.

كيف تتأكد: شوف في لوحة قاعدة البيانات متى آخر نسخة، وهل باقتك فيها نسخ يومية. بعدها رجّع نسخة في مشروع تجربة، وتأكد إن البيانات كاملة.

ليش يهمّ: في منتجات Supabase، المتصفح يكلّم قاعدة البيانات مباشرة بمفتاح عام. والجدول اللي بدون قواعد يقدر أي أحد يقرأه أو يعدّله.

كيف تتأكد: شغّل فحص RLS المجاني: دقيقتين، ويقول لك أي جدول مكشوف بدون ما نشوف بياناتك. افتح الفحص

ليش يهمّ: صفحة النجاح يقدر أي أحد يفتحها بدون ما يدفع. وإذا منتجك يفعّل الطلب لما تنفتح، يعطي الخدمة ببلاش.

كيف تتأكد: افتح رابط صفحة النجاح مباشرة بدون ما تدفع. إذا الطلب تفعّل، التأكيد في المكان الغلط.

ليش يهمّ: الدفعة اللي تنجح سهلة. اللي يضيّع الفلوس هي الدفعة اللي تفشل أو تتعلّق أو ترجع، ومنتجك ما يدري عنها.

كيف تتأكد: في وضع التجربة عند بوابة الدفع، جرّب بطاقة تنرفض، وبعدها رجّع مبلغ دفعة ناجحة. تأكد إن حالة الطلب في منتجك تغيّرت في المرتين.

ليش يهمّ: كل تعديل ممكن يخرّب شي. وإذا ما تعرف ترجع، أي نشر غلط يوقف منتجك حتى تلقى الحل.

كيف تتأكد: شوف في منصة النشر قائمة النسخ السابقة، وجرّب ترجع لوحدة منها في وقت هادي، عشان تعرف الطريق قبل ما تحتاجه.

ليش يهمّ: أغلب العملاء ما يبلّغون. يشوفون الخطأ ويطلعون، وأنت ما تدري.

كيف تتأكد: سوّ خطأ متعمّد في نسخة التجربة، وشوف إذا وصلك إيميل أو تنبيه. إذا ما وصلك شي، تحتاج أداة تتبّع أخطاء مثل Sentry.

ليش يهمّ: مفتاح مسرّب، أو كود يعيد نفسه بدون توقّف، ممكن يطلّع فاتورة بآلاف الدولارات في ليلة وحدة.

كيف تتأكد: في كل خدمة تدفع لها حسب الاستخدام (الذكاء الاصطناعي، والسيرفرات، وقاعدة البيانات)، حط حد أعلى للصرف أو تنبيه على مبلغ تعرفه.

ليش يهمّ: منتج يشتغل زين مع عشرة أشخاص ممكن يوقف مع ألف، خصوصًا لو كل صفحة تسأل قاعدة البيانات أسئلة كثيرة.

كيف تتأكد: افتح أثقل صفحة في منتجك من كذا جهاز في نفس الوقت، وشوف لوحة قاعدة البيانات: إذا الاتصالات قرّبت من الحد، صلّحها قبل الإطلاق.

ليش يهمّ: إذا إيميل التأكيد ما وصل، العميل ما يقدر يدخل، ويحسب منتجك خربان.

كيف تتأكد: سجّل بإيميلين جداد عند مزوّدين مختلفين، واطلب استعادة كلمة السر. شوف وين وصلت الرسالة، وكم أخذت.

ليش يهمّ: الخدمة المدمجة في Supabase ما ترسل إلا لإيميلات فريق مشروعك، وبحد رسالتين في الساعة. يعني عملاءك ما توصلهم رسائل التأكيد أصلًا، ويوقف التسجيل.

كيف تتأكد: في لوحة Supabase افتح إعدادات الإيميل في Authentication، وتأكد إن فيه مزوّد إيميل مربوط باسم نطاقك.

ليش يهمّ: نظام حماية البيانات الشخصية يطلب تقول للناس إيش تجمع عنهم وليش. وبوابات الدفع ومتاجر التطبيقات تطلبها قبل ما تقبل منتجك.

كيف تتأكد: افتح منتجك بدون ما تسجّل دخول، وتأكد إن رابط الخصوصية والشروط ظاهر في صفحة التسجيل وفي أسفل كل صفحة.

ليش يهمّ: الفوترة الإلكترونية إلزامية على المسجّلين في ضريبة القيمة المضافة، والفاتورة اللي تسوّيها بيدك ما تكفي.

كيف تتأكد: تأكد إن نظام الفواتير اللي تستخدمه متوافق مع متطلبات الفوترة الإلكترونية (وفي المرحلة الثانية مربوط بمنصة «فاتورة»)، وإن الفاتورة المبسّطة فيها رمز QR.